Sinopse de Cascallos contiáns e líricas breves
Aparecen no libro pequenos fragmentos da vida diaria, recollidos polo autor da vida e acerbo popular e tratados con excelente enxeño e ironía, non exentos de afecto e tenrura singular. Amor e humor hermanados en dous apartados. No primeiro, denominado «Cascallos cotiáns», relátanse unha serie de avatares ou «cousas da vida», que diría Castelao: as relacións do home-muller, os abusos do cacique, o asombro do aldeán fronte ás modernidades da urbe. E, no segundo, baixo o epígrafe de «Líricas breves», recóllese unha serie de reflexións que, ao final, déixanse caer de forma pausada da mente poética do autor, como follas da árbore, cara ao colo húmido da terra. Coñecidos autores de humor gráfico galego ilustran, coas súas viñetas, as pequenas historias dos cascallos, cuxa breve recensión acompáñase ao final do libro: José Carlos Vázquez, Xosé Lois, Manolo Zapata, Nacho Hortas, Gogue, Kiko da Silva, Forxán, Pepe Carreiro, Omar Pérez, Mariano Garrido e Bertho.
