Sinopse de A praza Maior de Auriabella
Ourense —tamén coñecida como Auriabella—, ten a súa orixe na zona onde hoxe se atopa a praza Maior, a Barreira, a rúa Cervantes e as Burgas, en definitiva, onde inicialmente se atopaba o foro romano. Ese territorio de augas quentes, verdadeira encrucillada de vías, augas e ríos, deu lugar ao núcleo de poboación que hoxe é Ourense.
Neste libro titulado A praza de Auriabella o seu autor, Jesús Fernando Román Alonso, estuda esencialmente as construcións existentes na súa praza Maior, analiza cada unha das súas fachadas, as entidades públicas e privadas existentes, os personaxes que nela moraron, as feiras alí desenvoltas dende hai máis de novecentos anos e os negocios que nela se instalaron… En definitiva, describe a historia desta praza, núcleo histórico da nosa cidade e escenario de acontecementos determinantes para a veciñanza ourensá das distintas etapas históricas.
