Sinopse de Ourense de Auga
Ourense de auga é un recoñecemento á cidade das Burgas, cuxa identidade está vencellada á auga. Así o confirma a etimoloxía máis cabal do seu topónimo: o termo auria, hidrónimo paleuropeo que significa «auga» ou «río», ao que se engadiu o sufixo –ensis latino.
Coas imaxes se documentan e capturan instantes dese fluír hídrico que a través do tempo foi configurando as veas e arterias do territorio ourensán, deitando aquí e acolá fervenzas, ríos, encoros, fontes, balnearios e augas medicinais que actualmente son puntos de interese clave para as xentes de España e Portugal e para os peregrinos que van camiño de Compostela e do Finis Terrae.
